19 May COMO RECUPERAR O IVE DAS FACTURAS IMPAGADAS.
Na actualidade non é pouco frecuente que profesionais autónomos e empresas busquen asesoramento en relación ás facturas emitidas e impagadas e polas que, no seu momento, tiveron que abonar ás arcas públicas o correspondente importe de IVE. Para aqueles casos nos que non se consegue o cobro das facturas pola situación de iliquidez do cliente moroso, existe un proceso para recuperar o IVE mediante a emisión de facturas rectificativas, con modificación da base impoñible, cuxos requisitos e prazos son distintos segundo se trate dun ou doutro dos seguintes supostos:
- Caso de que o debedor sexa declarado en concurso de acredores: a factura rectificativa deberá realizarse no prazo de un mes dende a data de publicación no BOE do Auto de declaración de concurso da empresa debedora.
- Caso de créditos incobrables (son aqueles nos que é requisito necesario haber interposto reclamación xudicial contra o moroso ou dirixir fronte ó mesmo requirimento notarial e non conseguir o cobro da débeda): neste caso é preciso que haxa transcorrido o prazo de un ano dende a emisión da factura impagada (prazo que no caso das Pemes será de seis meses) e a emisión da factura rectificativa deberá efectuarse no prazo dos tres meses seguintes á finalización do referido prazo de un ano dende o devengo do IVE (ou seis meses para as Pemes). No caso de operacións ás que sexa de aplicación o réxime especial do “criterio de caixa”, o prazo de tres meses para a emisión da factura rectificativa computarase a partir da data límite do 31 de decembro do ano inmediato posterior a aquel no que se houbese realizado a operación.
En ámbolos dous casos a factura rectificativa deberá ser remitida ó profesional ou empresa debedora por calquera medio que permita ter constancia da súa recepción. E tamén deberá comunicarse a modificación da base impoñible á Delegación ou Administración da AEAT corresponde ó domicilio fiscal no prazo de un mes dende a data de expedición da factura rectificativa.
O proceso de recuperación do IVE é certamente un trámite que non se atopa exento de burocracia, ademais de contar cuns prazos que gozan de máis ben pouca flexibilidade. A cuestión dos prazos é fundamental, pois unha vez transcorridos os mesmos sen a emisión da correspondente factura rectificativa xa non poderemos acollernos ó proceso de devolución do IVE.
E pode acontecer que con posterioridade se consiga o cobro total ou parcial da factura inicial, circunstancia que de chegar a producirse non obrigaría a modificar de novo a base impoñible á alza nin conleva á devolución do IVE recuperado. Só se procederá a ingresar o IVE recuperado no caso de que o acredor desista da reclamación xudicial ou do requirimento notarial, ou que con posterioridade se alcance un acordo co debedor en canto ó pago ou se produza unha renovación da débeda.
Por último, convén ter en conta que naqueles casos nos que se faga preciso acudir á vía xudicial existe un procedemento específico para a reclamación de facturas impagadas, o chamado proceso monitorio, que se caracteriza por un escaso formalismo e unha tramitación máis áxil. Non obstante, este non é o único procedemento posible; en Airado Bello Avogadas estudamos cada caso de xeito individualizado a fin de elixir o procedemento máis efectivo segundo as circunstancias.
No Comments