29 Sep HERDANZA CON DÉBEDAS? A ACEPTACIÓN A BENEFICIO DE INVENTARIO E O DEREITO DE DELIBERAR.
Cando se causa dereito a percibir unha herdanza é importante, antes de proceder á súa aceptación ou á súa renuncia, coñecer a situación económica da mesma, é dicir, o valor dos bens que a conforman así como se existe algunha carga ou débedas.
Naqueles casos nos que exista pasivo e débedas de valor relevante que fagan dubidar de se a herdanza resulta ou non antieconómica, o herdeiro dispón de dúas figuras xurídicas ás que poder acudir: a aceptación da herdanza a beneficio de inventario e o dereito de deliberar.
Existen dúas formas de aceptación dunha herdanza: a aceptación pura e simple e a aceptación a beneficio de inventario. Coa aceptación pura e simple, que é a habitual, o herdeiro recibe os bens da herdanza xunto coas débedas existentes, polas cales responderá persoalmente, isto é, co seu propio patrimonio. Pola contra, a aceptación a beneficio de inventario implica que o herdeiro queda obrigado a pagar as débedas e cargas da herdanza pero só ata onde alcancen os bens da mesma, sen que en ningún caso se vexa comprometido o seu patrimonio particular. Coa aceptación a beneficio de inventario o que se pretende é que se liquide a herdanza, que se confeccione un inventario mediante a determinación do activo e do pasivo, procedendo ó pago ós acredores e con adxudicación do sobrante ó herdeiro.
Outra opción que contempla o noso ordenamento xurídico é o dereito de deliberar, en virtude do cal o herdeiro pospón a aceptación ou renuncia da herdanza a un momento posterior para que, con carácter previo, se proceda á formación do inventario a fin de ter un coñecemento exacto do activo e do pasivo que integra a herdanza e, tras iso, decidir se acepta ou se renuncia.
En canto ós tramites, tanto a aceptación da herdanza a beneficio de inventario como o exercicio do dereito de deliberar deberán realizarse ante Notario e poderán solicitarse por calquera dos herdeiros.
Aconsellamos, pois, que antes de aventurarse a renunciar ou a aceptar unha herdanza se teñan en conta e se valoren estas dúas opcións, a aceptación a beneficio de inventario e o dereito de deliberar, que se ben non resultan moi coñecidas, son as únicas vías que garanten ós herdeiros poder percibir unha herdanza libre de débedas.
No Comments