16 Jun REXISTRO DE CONTROL DA XORNADA ORDINARIA DOS TRABALLADORES.
Unha das campañas abertas pola Inspección de Traballo é a comprobación de se polas empresas se está a levar un rexistro específico de control da xornada ordinaria dos traballadores, sexan a tempo parcial ou a tempo completo.
Esta obriga de rexistrar día a día a xornada realizada polos traballadores xa existía en relación ós contratos a tempo parcial, así como para as horas extraordinarias. Agora, a máis recente Xurisprudencia ven entendendo que o cumprimento desa obriga de rexistro das horas extraordinarias só é posible se se dispón dun rexistro da xornada diaria completa de cada traballador, porque só así se determina a xornada efectivamente realizada, de tal xeito que permita discriminar que horas son ordinarias e cales son extraordinarias.
Non hai un modelo oficial de rexistro de control da xornada; cada empresa deberá confeccionar un propio no que se contemple a identificación da empresa e do traballador, especificación da xornada de traballo estipulada no contrato de traballo, detalle das horas laborais ordinarias, complementarias e extraordinarias, realizadas, desglosadas por cada día de traballo, firma diaria do traballador, hora de entrada e saída do centro de traballo e firma do representante legal da empresa.
Que sancións conleva o incumprimento? O incumprimento desta obriga constitúe unha infracción leve en materia laboral, que pode sancionarse con multa de 60 a 625 euros. Se da levanza de dito rexistro se constatase a transgresión dos límites da xornada, horas extras e complementarias, considerarase unha infracción grave, sancionable con multa de 626 a 6.250 euros. Ademais, o feito de non dispor de tal rexistro no caso de traballadores a tempo parcial implicará que o contrato se presumirá realizado a xornada completa.
Por último convén ter en conta que os rexistros de xornada deben conservarse durante alomenos catro anos.
No Comments